ജീവനക്കാരുടെ മിന്നൽ പണിമുടക്കിനെ തുടർന്ന് എയർ ഇന്ത്യ എക്സ്പ്രസ് കൊച്ചിയിൽ നിന്നും കണ്ണൂരിൽ നിന്നുമുള്ള വിമാനങ്ങൾ മുന്നറിയിപ്പില്ലാതെ റദ്ദാക്കി. നൂറുകണക്കിന് യാത്രക്കാർ വലഞ്ഞു. കണ്ണൂരിൽ നിന്നുള്ള മൂന്ന് വിമാനങ്ങൾ റദ്ദാക്കിയപ്പോൾ കൊച്ചി വിമാനത്താവളത്തിൽ നിന്നുള്ള നാല് സർവീസുകൾ നിർത്തിവച്ചു. തിരുവനന്തപുരം ഉൾപ്പെടെ ഇന്ത്യയിലെ വിവിധ വിമാനത്താവളങ്ങളിൽ നിന്നുള്ള വിമാനങ്ങളും റദ്ദാക്കിയതായി റിപ്പോർട്ടുകൾ പറയുന്നു. തങ്ങളുടെ പ്രതിഷേധം രേഖപ്പെടുത്താൻ നിരവധി യാത്രക്കാർ സോഷ്യൽ മീഡിയ പ്ലാറ്റ്ഫോം X-ൽ പോസ്റ്റുകളുമായെത്തി.
ഓപ്പറേഷനൽ പ്രശ്നങ്ങളെ തുടർന്നാണ് വിമാനങ്ങൾ റദ്ദാക്കിയതെന്ന് എയർ ഇന്ത്യ എക്സ്പ്രസ് പറഞ്ഞെങ്കിലും ജീവനക്കാരുടെ മിന്നൽ പണിമുടക്കാണ് കാരണമെന്ന് റിപ്പോർട്ടുകൾ സൂചിപ്പിക്കുന്നു. കൊച്ചിയിൽ നിന്ന് യഥാക്രമം 2.05, 8, 8.35, 8.55 നും പുറപ്പെടേണ്ട വിമാനങ്ങളാണ് റദ്ദാക്കിയത്. ഷാർജ, മസ്കറ്റ്, ബഹ്റൈൻ എന്നിവിടങ്ങളിൽ നിന്നും കൊച്ചി വിമാനത്താവളത്തിലേക്കുള്ള വിമാനങ്ങളും റദ്ദാക്കി. കണ്ണൂരിൽ അബുദാബി, ഷാർജ, മസ്കറ്റ് എന്നിവിടങ്ങളിലേക്കുള്ള വിമാനങ്ങൾ റദ്ദാക്കി.